立法會選舉參選人申報選舉開支尋日結束，我哋發現喺旅遊界功能界別落選嘅金怡假期董事長葉慶寧（Freddy），佢申報書內有啲內地通話紀錄費用開支。Freddy喺宣布參選立法會後，佢竟然打咗去珠海超過十五次，仲有幾次打去深圳、海南同北京，莫非佢因為啲業界選民返晒內地，所以要打電話到內地拉票？不過，大部分通話時間都只係一分鐘，究竟個電話係咪飛咗去對方嘅留言信箱，咁就唔知喇。
至於喺新界東地區直選落敗嘅經濟動力邱榮光團隊就認真威水，佢哋同一名單嘅六位候選人，竟然每位都要食物環境衞生署出手幫佢哋拆走啲選舉宣傳品，單係邱榮光一人就已經要食環署幫佢拆走十八份宣傳品，共罰款約五千二百元；而排喺佢後面嘅其餘五位候選人就一共要食環署移除二十份宣傳品，亦罰咗四千多元。邱榮光咁講環保，但一場選舉就留低咁多廢物要人執手尾，認真諷刺。