政情：大閘蟹豐收 皆因夠「和諧」
民建聯進出口界議員黃定光（象哥）嘅中華出入口商會會所，由於有門路入肥美大閘蟹，所以佢年年都會以蟹會友，一邊拆蟹一邊風花雪月。以往大閘蟹價格年年上升，但象哥就話今年蟹價無貴到，因為幾個蟹湖不但大豐收，仲出產唔少巨型大蟹。至於點解大豐收，象哥就話因為幾個主要「蟹倉」都無風無雨，夠晒「和諧」，啲蟹仔先可以茁壯成長變大蟹喎。
象哥話，太湖、陽澄湖同洪澤湖等幾個蟹湖，今年都冇乜大型潮漲潮退，令啲蟹仔唔會被急流沖走，可以安然成長，估唔到湖嘅「和諧」咁緊要。食咗咁多年蟹，象哥已經去到「蟹神」級數，唔使睇隻蟹，就咁拎上手已經估到係公定係乸，但象哥喺今年蟹季只係食過一隻蟹就要鳴金收兵，因為佢太座林淑儀落咗柯打，唔准佢食咁多，皆因膽固醇太勁。
尋日象哥好聽話，眼見大家不停拆蟹都冇心郁，只係叫大家食多啲。慷慨好客嘅象哥，仲諗住今個星期五請埋一班民記兄弟食蟹，諗住當係選舉慶功宴，但點知撞正財委會要審議長者生活津貼，睇嚟佢哋都冇乜口福喇。