政情：香港設計年 創意大爆發
香港成日被人笑係文化沙漠，唔少有心人高唱反調，好似香港設計中心行政總裁利德裕（Edmund）同創意香港總監廖永亮（Jerry），就齊心搞旺「2012香港設計年」。Edmund話，唔少鄰近國家已大搞創意經濟，打造成創意城市，香港冇理由執輸。
Edmund近月走訪曼谷、北京、上海及新加坡，原來各地紛紛搞大型藝術展覽及論壇，推動創意氣氛熱烈，當然要觀摩吓啦。香港都唔輸蝕，踏入十一月後，創意生態展、亞洲色彩展、設計營商周等，節目多籮籮。嚟緊十一月底將舉行「巴士設計遊」，可以安排市民免費去睇晒有關展覽，行程約半日。
查實唔少高官已背後發功，Jerry就爆料話，商務及經濟發展局局長蘇錦樑（Greg蘇）早前隨貿易發展局出席杭州招商活動時，遇見一班年輕設計師，大家都傾足個幾鐘。傾乜咁開心？之唔係講吓香港未來設計界發展藍圖囉。有政府牽頭支援，香江又人才濟濟，夠晒條件搞旺創意經濟喇。