政情：民記上廣東謝票？
聖誕節話咁快又到，唔少立法會議員都會把握機會出去旅遊度假輕鬆吓，但喺九月立法會選舉大勝嘅民建聯（民記）就冇咁悠閒喇，事關該黨一班領導層將率領旗下一眾立法會議員，聖誕節後會北上去廣東省交流探訪，除咗同班鄉親見面外，亦會禮節性拜會當地廣東省領導同統戰部。今次話就話係加強同內地部門溝通，但有消息人士透露，去得統戰部，梗係去多謝相關單位喺選舉期間大力聯繫香港各同鄉會拉票啦！
落力同省部門溝通
香港各省各鄉嘅同鄉會，一向都有好嚴謹嘅聯絡同組織，喺選舉期間可以發揮到好大效用。無他嘅，同鄉會會員同聲同氣，平日溝通都用鄉下話，拉票又點會唔容易過其他政黨同組織吖。民記今次嘅廣東省團將會喺十二月廿八至三十日舉行，據講佢哋會先齊集廣州市，留一陣之後，就會兵分兩路，一隊往東莞、惠州方向出發，另一隊就去潮汕探訪，務求三日之內行勻成個廣東省，拜訪到幾多得幾多。
消息人士話，今次交流團其實有兩個重要目的，其中一個係加強民記同廣東省政府各部門嘅聯絡同溝通，梗係啦，香港市民如果喺內地遇到問題，返到香港要搵政黨求助嘅話，唔搵民記就係搵工聯會。真係幫到手的話，呢啲選票就自然收歸己有，民記梗係分外落力，要搵內地部門溝通溝通啦。至於第二個行程，就係拜訪當地統戰部，據聞呢個隱性行程其實先係行程嘅重中之重。
雖然香港好多市民嘅祖籍來自五湖四海，但仍然係以廣東省為主，設於香港嘅各大小同鄉會，平日就負責聯繫鄉親，有事時就出手相助，同會員間嘅接觸十分緊密。喺選舉期間，同鄉會亦發揮意想不到嘅功用，但若然冇統戰部首肯，佢哋絕對唔會胡亂支持任何候選人，咪以為民記代表建制派就奉旨有票，更加唔好當咗啲票係自己呀，如果得唔到相關單位祝福，真係想贏都難喇。