中環出更：胡法光獲榮譽博士父子同台成佳話
近期係大學頒授學位嘅旺季，尋日就輪到城市大學，分別向「電梯大王」胡法光同「蘭桂坊之父」盛智文頒授榮譽社會科學博士及工商管理學博士學位，仲有向中國科學院院長白春禮頒授榮譽理學博士學位。巧合嘅係，胡法光長子胡曉明（Herman）剛任城大校董會主席，結果兩父子同穿學術禮袍於典禮台上，成為黌門佳話。
據有份出席典禮嘅審計署署長孫德基話，今次城大頒授榮譽博士嘅名單，係佢年初做校董會主席時嘅決定，所以胡法光獲頒榮譽博士，並非Herman嘅主意。孫德基又話，城大原先嘅校董會主席係梁振英（CY），其後因為CY要選特首，於是就由佢接掌主席職務，點知做咗幾個月，佢又要出掌審計署署長，最後由Herman補上空缺。如此兜兜轉轉，胡氏兩父子於城大聚首，世事真係奇妙。
另一位到場支持胡法光嘅嘉賓、中華廠商聯合會行政總裁梁世華話，胡法光不但創業有道，而且對體育運動貢獻良多，獲頒榮譽博士學位係實至名歸。至於乖仔胡曉明就話，城大係一所好有朝氣嘅大學，能夠擔任校董會主席覺得好榮幸。
盛智文雙喜臨門
至於盛智文就對自己嘅成就獲得肯定感覺自豪，而佢嘅太太亦帶埋一對仔女到場為佢打氣。精於營商嘅盛智文向城大學生分享其創業之道，就係選擇自己喜歡嘅職業，唔好成為金錢嘅奴隸，亦要飲水思源，切勿忘本。如此語重深長，好多學生都非常受落，紛紛要求同佢合照。盛智文又透露，今次係首次有本地大學向佢頒授榮譽學位，而過幾日科技大學亦有一個榮譽學位頒畀佢，確係雙喜臨門。
卓妮