弊傢伙，今次真係冇面見人，丟臉丟到毀容咁滯！
號稱以醫學科技幫顧客美容嘅DR毒血針殺人事件大家記憶猶新啦，家陣又發生另一宗類似嘅慘烈個案，受害人一照鏡就想喊，日日出街都唔敢抬起頭。事件女主角係三十三歲嘅文職小姐，本來樣貌娟好o架，點不知今年九月如常幫襯一間相熟嘅美容院就出事。駐院美容師話喎，有一個二氧化碳激光機療程好好o架，做完皮膚靚到冇人有。女主角基於對美容師嘅信任，冇提出疑問，只係要求唔好做得太過刺激皮膚嘅療程，因為一星期之後會外遊。美容師冇講解激光機嘅效用同風險，一嘢就着機開工。療程完成之後，女主角發現雙頰通紅又感到刺痛，美容院職員多番強調係正常反應，過幾日就冇事咁話，做多啲保濕同防曬就得o架嘞。
問題係，女主角過咗幾日不但情況冇改善，反而額頭以及雙頰都長出好多紅色粒粒，後來更加惡化成膿瘡，流出黃色液體。感到大事不妙嘅女主角外遊之後即刻求診，醫生斷定係燒傷，後來再去沙田威爾斯親王醫院急症室，化驗證實感染金黃葡萄球菌。簡單咁講，女主角塊面爛咗，罪魁禍首又係累人累物嘅醫學美容！
到底二氧化碳激光機係乜乜東東芫荽葱？皮膚科專科醫生就話嘞，呢家嘢係高能量儀器，病人必須麻醉，術後必須護理，療程必須小心。言下之意即係話，美容師識少少扮代表亂咁嚟，簡直好似一個無牌人士駕駛大膽車，仲要係一部大馬力超級跑車，唔撞死人都偷笑咯。
唉，歸根究柢又係庸懶官僚失職之過，監管粗疏嘅老毛病再次發作。上次DR毒血針殺人事件已經揭發一個大漏洞㗎啦，香港枉稱國際大都會，相關嘅監管法例居然一無所有，連乜嘢叫做醫學美容都未有定義，女為悅己者容嘅貪靚一族隨時以身犯險，輕則爛咗塊面，重則冇咗條命，你話係咪得人驚吖？
嗱嗱嗱，功夫茶記得食衞局局長高永文講過o架，唔會放過任何毒血針攞命嘅相關人等。如果高局長有腰骨又有膊頭，麻煩坐言起行好好監管醫學美容，畢竟一個人爛面等於成個香港都丟臉，傳出江湖鬧笑話呀，局長大人！
講真吖，醫學美容成行成市絕對係監管粗疏嘅後果，至於監管點解咁粗疏呢？有一派講法係咁嘅，特區政府為咗發展所謂醫療產業，所以刻意網開一面，冇定下嚴格嘅監管準則。如果呢一個講法屬實，情況就好比為咗促銷汽車刺激經濟，執法者唔去阻止無牌人士駕駛大膽車。
局長呀局長，有人爛面喇，香港丟臉喇，閣下知醜唔知醜呀！