政情：大舞台：林鄭訪歐 暫別「府中囝囝」

政務司司長林鄭月娥最近真係忙到抽筋，啱啱忙完行政會議成員林奮強賣樓風波，接住又要處理重組人口政策督導委員會及重設扶貧委員會，尋日更加連中學縮班問題，都要佢出手幫落區教育局局長吳克儉拆彈，真係唔知邊個係局長。好彩林鄭明晚就會離港出訪英國同西班牙六日，期間可能有機會見吓佢喺英國嘅老公同囝囝，相信湊自己個仔點都好過留喺香港繼續幫其他政策局湊仔。