民主黨黃碧雲之前喺社交網站話，喺區議會沙田鞍泰區補選同佢哋爭地盤嘅新民主同盟係民建聯B隊，結果被網民群起攻之，點知事隔幾日，佢尋日喺立法會內務委員會上又衰多鑊。話說公民黨梁家傑動議喺立法會大會就行政會議成員林奮強休假安排提出休會辯論，點知呢舊碧雲竟然投錯票，咁就否決咗袋巾傑嘅動議，真係人如其名一舊雲。
袋巾傑提出嘅休會辯論投票結果係廿九票贊成、廿九票反對、一票棄權，結果動議喺內會主席梁君彥（Andrew）投下決定性嘅反對票下被否決。袋巾傑嘅動議被否決本來唔出奇，但出奇嘅竟然係黃碧雲投咗棄權票。黃碧雲會後就話自己明明投贊成票，但結果就出咗棄權票，不幸嘅係佢喺Andrew宣布結果時先至知，莫非佢發夢雲遊緊？
雖然黃碧雲講到好似係電腦出錯，但主席Andrew就反駁話，黃碧雲喺主席叫議員投票同核對投票時就應該睇清楚，甚至顯示屏顯示結果時都仲可以出聲更正，但黃碧雲喺三個步驟都冇提出更正，所以冇得更改投票結果咁話。