政情：聲沙高永文做「健康大使」
香港多個深層次問題急待解決，各問責局長入得官場呢個熱廚房都全力以赴，有時可能過分操勞不知不覺捱病咗，講緊嘅係食物及衞生局局長高永文，原來佢患咗上呼吸道感染搞到聲沙沙，所以佢都不敢怠慢帶定樽消毒液洗手，以身作則做好個人清潔衞生。
高永文尋日應邀出席一個洗腎中心嘅活動，平時向來中氣十足嘅佢，一開腔竟然聲沙沙。佢話由於近日天氣轉變，所以患上呼吸道感染，但佢強調唔係患感冒，亦冇發燒，佢見到會場提供樽裝水，即二話不說拎起飲兩啖潤吓喉，又拎起支消毒液洗手。
高永文其後更疑似「健康大使」上身，話流感最易透過握手及飛沫傳染，自己日日去咁多活動，一定要保持個人清潔衞生，咁先唔會將病毒傳畀人喎。高永文帶病在身仍然不忙向各界推廣預防疾病，局長呢份工認真唔易做。