政情：鄭耀棠損手 畀嫻姐「夾」傷？
工聯會最近因為堅決反對長者生活津貼（長津）要資產審查，結果搞到內外交困，矛頭更直指昔日「票后」、超級區議員陳婉嫻話晒事。久未露面嘅工聯會榮譽會長鄭耀棠，尋日甫現身就即時救火，承認工聯會面對正反意見，處於夾縫中間，咁啱棠哥嘅右手虎口位置附近突然損咗，難度棠哥弦外之音係畀嫻姐夾損手？
棠哥尋日出席公開活動後開腔評論長津事件，首先指出工聯會堅持七十歲以上長者免資產申報領取長津嘅立場好清楚，否認嫻姐係同泛民主派聯手做嘢。棠哥其後更疑似為工聯會處於目前困境定下調子，佢承認工聯會聽到外面有兩種意見，即一組人需要資產申報，另一組人認為絕對不可以有資產申報，故確實處於夾縫中間。
至於工聯會最終投票意向係點，棠哥話由幾位立法會議員自己討論同決定喎，難道棠哥見到呢個困局都無能為力「拆彈」？不過，如果工聯會最後選擇跪低支持長津，或離場間接令長津撥款通過，為何當初唔選擇支持呢？唔使搞到全港四十萬長者白白冇咗一個月津貼。