政情：貪曾賀壽富商 鬼祟傘陣遮掩
本地印度裔望族夏利里拉家族掌門人夏利萊博士（Hari Harilela），前晚喺家族經營嘅尖沙咀金域假日酒店設宴慶祝九十大壽，唔少政商界名流齊去送上祝福。夏利萊出名樂善好施，前幾日先至豪捐五百萬元畀科技大學培育人才，原來佢都好念舊，就算「貪曾」曾蔭權形象衰到貼地，做壽當晚都請埋貪曾去飲，仲要有份坐主家席，等貪曾有餐食吓，但貪曾有冇做人情就唔知喇！
但貪曾夫婦始終改唔到出巡勞師動眾嘅惡習，當晚佢哋坐座駕到酒店時，唔止有幾名保鏢貼身幫佢開路，仲勞煩酒店出動五、六名保安阻擋記者採訪。到晚上十點幾離開時，冇風冇雨，但酒店保安就開晒四、五把遮，施展傘陣幫貪曾夫婦遮擋路人視線，極之鬼祟。人哋大壽高高興興，好心貪曾就大方啲向外界揮吓手，如果咁閃縮唔想畀人見，不如龜縮返屋企好過啦！