政情：女童軍總會 又爆是非
素來由富豪高官太太做高層嘅香港女童軍總會，繼一○年選總監鬧出軒然大波後，近日又再是非滿天飛。我哋近日收到個投訴電話，話現任總監彭徐美雲有意向前朝遺臣、現任總幹事曹周麗智開刀，理由係曹太冇大學學位，唔符合有關職位嘅入職要求。不過，當我哋深入調查後，發現竟然案中有案，有人反指彭太提拔包括自己在內一批知名人士做副會長，目的係為自己退任總監後鋪路喎。
呢場疑似炒總幹事風波，其實之前亦已經發生過，曹太冇大學學位，一○年嘅時候亦已經畀人翻出嚟講過，而女童軍總會當時亦解釋過，總幹事職位從來冇要求有大學學位，工作經驗反而仲實際。今次嘅投訴人仲透露，一班女童軍總會高層，日前召開秘密會議，目的係想保住曹太，仲意圖逼走希望「撥亂反正」嘅彭太咁話。不過，事情發展峰迴路轉，我哋明查暗訪後，竟然聽到有另一個版本故事。
群情洶湧 彭太「退選」
話說彭太日前向總會有投票權嘅成員發電郵，推薦包括佢自己在內八位社會賢達做副會長，但有成員就質疑，彭太仍然係總監，為乜要做副會長先？於是就提出反對，彭太見群情洶湧，於是自行退選。至於另外七位社會賢達，據聞一班成員就冇反對佢哋做副會長。由於故事實在太離奇，我哋於是搵彭太回應，彭太澄清，並非佢自己想選副會長，只係有人提名佢，但後來因為想尊重其他人嘅意見，所以就自行退出參選。
咁做唔成副會長會否唔開心呢？彭太話，做唔成副會長亦唔緊要，因為佢唔想是非爭拗太多，搞到個會好唔和諧，加上佢都唔心急，做副會長一事遲啲先至再講喎。彭太質疑，點解啲人成日要針對佢哋呢？希望大家畀啲空間佢哋一班有心人做實事。整件事誰是誰非，肯定只有當事人先知，不過咁，女童軍總會班高層真係要諗諗，因乜個會成日有是非，一日唔解決個源頭，一日個會都唔可以盡展所能，亦為年輕女童軍樹立壞榜樣，唔通真係要將「告密」同「搞是非」成為女童軍嘅精神咩！