中環出更：立會宴請CY 見盡議員百態
新一屆立法會尋日首次宴請政府高官及行政會議成員，一眾官員同議員喺新大樓宴會廳食飯前把酒言歡、談笑風生，一反平日喺議會內劍拔弩張嘅態度，更見盡議員百態。特首梁振英（CY）喺午宴開始前十分鐘到場，作為議會新丁嘅范國威（Gary）博出位，即時上前送上水墨畫一幅，要求CY唔好發展大埔龍尾泳灘。
六十幾位立法會議員同三十幾位官員喺進入宴會廳前要先抽籤決定座位，白鴿黨涂謹申同經民聯林健鋒就分別坐喺CY同立法會主席曾鈺成隔籬。阿涂話，CY喺食飯時都好健談，除咗同議員們分享自己去中東旅遊嘅趣事外，仲教其他人點樣分辨各國嘅生蠔。當初白鴿黨唔係拒絕去禮賓府同CY食飯嘅咩，點解尋日又肯同CY食飯呢？
女將靚衫搶鏡
按照傳統，特首同議員食完飯後就會落地下影全體大合照，多位女將都各自着上唔同顏色嘅靚衫鬥搶鏡。民建聯葛珮帆就揀咗着紫紅色衫，蔣麗芸（Ann姐）就以一身黑色套裝配長珍珠頸鏈示人，佢話唔介意被其他女議員搶去風頭喎。咁Ann姐就唔使太驚，事關佢當眾「丘」褲嗰吓真係搶晒鏡，在旁嘅李慧琼都望住陰陰嘴笑。
至於男議員就多數着西裝打呔，但Gary、梁家傑、謝偉銓、經民聯石禮謙及張華峰就不約而同打上橙色呔，有兩人更曾經係唐營人士添，難道已經變晒「香港營」。謝偉銓笑言，平時已經成日畀人當佢係「梁粉」，梁家傑就大笑回應：「你覺得我咁着代表『齊心』？」
要數最精彩嘅一幕，一定係新民黨主席葉劉淑儀同副主席田北辰霸位影合照。話說兩人講明另有飯局缺席午宴，但轉頭被發現佢哋一早到大樓地下霸靚位等影合照，兩人企定定喺CY張空櫈後面，寧願玩手機打發時間都唔敢行開，似小學生罰企咁款。
梁美芬唔見影
當大家企定定準備埋位影相時，貼心嘅秘書處職員一如既往為身材矮小嘅何俊仁提供一疊A4白紙，等佢可以喺最後排高位再墊高啲，避免喺合照中消失。話時話，尋日除拉布四子冇到外，亦唔多覺見到梁美芬，唔知佢去咗邊呢？
卓妮