咦，又有立法會議員要求政府擱置一個計劃喎，唔通上台執政四個月嘅梁朝新政府真係弱雞成咁，一有任何政策出台就要面對撤回嘅反對派壓力？推行國民教育係咁，發展新界東北係咁，興建龍尾泳灘又係咁，禮賓府主人未曾腳痛已跛腳，好鬼死可憐呀！
最新一宗政客施壓事件係咁嘅，立法會房屋事務委員會通過一項冇約束力嘅議案，要求政府暫時擱置白表免補地價購買居屋計劃，促請官老爺重新檢討呢個房屋政策嘅得與失，避免推高居屋二手市場價格。至於原先嘅計劃係點嘅呢？不如聽聽相關官員現身說法。
房屋署助理署長招建慈介紹，喺每年推出嘅五千個白表免補地價購買居屋嘅名額之中，家庭佔四千五百個，單身人士佔五百個，入息限額會喺開售前一個月公布，如果申請超額會以抽籤方式分配。首批二千五百個名額將於明年五月發出批准信，第二批二千五百個名額嘅批准信就明年十二月發出。
見到立法會搞搞震要求擱置計劃，運輸及房屋局局長張炳良就話嘞，計劃未實行就擱置係不負責任嘅做法。張局長又話，計劃目標係幫助冇能力喺私人市場買樓，但又超出申請公屋資格嘅人士，重申有關計劃係二○一六年推出新居屋之前嘅過渡安排。
講到呢度，大家明唔明點解議員擔心居屋二手市場價格被推高？講真吖，都唔算杞人憂天o架，如果一大班白表人士浩浩蕩蕩走去入紙申請免補地價購買居屋，一定會造成供不應求嘅轟動效應。你知啦，香港樓市嘅瘋狂天價長升長有，供不應求始終係一大關鍵，否則屯門樓都唔使賣到過萬元一呎咁誇張，導致無殼蝸牛愁上加愁，唔少人迫於無奈蝸居劏房。
係嘅，冇錯，財金決策者最近推出兩招加稅措施企圖穩定樓市，樓宇買賣當堂窒住窒住，之但係樓價仍然高企喎。假如有免補地價居屋發售，蝸居一族爭崩頭入市，搶高二手居屋價格嘅情況的確有可能發生。
功夫茶絕對唔會反對政府出手幫助夾心階層置業，不過今時今日真係要審時度勢囉，千祈唔好弄巧反拙。唔好唔記得，回歸以來特區政府一次又一次話要令到市民安居樂業，結果蝸居一族愈來愈多，劏房業主賺到盆滿缽滿，地產霸權更加係為所欲為。既然係咁，唔該運輸及房屋局諗清諗楚，畢竟房屋政策關乎眾生禍福，係唔可以胡亂籌謀o架。
立法會通過嘅擱置議案冇約束力，唔代表官老爺可以坐視不理。張局長呀張局長，開多幾次腦震盪大會畀心機檢討啦！