禍港七年的貪曾，在位時視民望如浮雲，大有「水月一場水月事，風雨來去還風雨」的脫俗；難得佢樂於做「離岸特首」，豪住總統套房，只用一招「吹水治港」，試問香港有乜辦法唔係樣樣輸畀新加坡！劏房市民嘅「房事」點會有改進啊！
好喇，仲畀廉署查緊嘅貪曾，下台後依然未能「修心養性」，未能「小舟從此逝，江海度餘生」，依然愛蒲，出席鄉紳飯局，甚至去教堂，都會有咁啱得咁蹺撞到李漢奸？一個過氣政客同一個污名纏身嘅前特首，兩個前後腳入教堂，之後又刻意分開閃人，唔通一般人如老朽會聯想到佢哋同場望彌撒，會係「當時只是平常事，過後思量倍有情」？
都係本報「政情」版詰問得好：兩個咁愛搞事嘅人同場，有冇密斟攪局，真係畀人有無限想像空間。
貪曾禍港，罄竹難書。
呢呢呢，佢落台前濫授勳，慰勞「曾朋友」，總之不論阿豬阿狗，只要係「自己友」，不理品行操守，坊間劣評如潮，貪曾就是要「大秤分金銀，大碗吃酒肉」，貶低整個特區授勳制度及真正德高望重嘅勳賢。
猶幸CY撥亂反正，已宣布褫奪三名在貪曾任內，因貪腐罪行入獄嘅政商人士勳銜，是回歸十五年來首次。
CY上台四個多月，日日掛住撲火，新政推一項跪低一項，暫時都真係冇乜值得為佢大力鼓掌，之不過，如果佢能夠嚴格執行授勳名單，令「授勳」不再變成貪曾時一種庸俗的機關作風，老朽都畀個Like佢。