踢慣「前鋒」嘅人民力量陳偉業，「中場」嘅立法會主席曾鈺成、醫學界梁家騮同社民連梁國雄都表明會留任足球隊，謝偉俊就話會繼續湊熱鬧玩埋一份。新丁方面，民建聯陳克勤、何俊賢（Steven）同陳恒鑌會組成「三劍俠」一齊出賽，全場最高嘅Steven就負責守龍門。
取代民主黨李永達同黃成智加入新一屆足球隊嘅單仲偕話自己踢慣後衞，胡志偉就話可以負責「人盯人」。工聯會郭偉強同新民主同盟范國威異口同聲咁話踢邊個位都無所謂，可以同其他隊友「搓吓波」後先決定喎。
人腳齊，但領隊未定，按足球隊不成文規矩，領隊每次踢完波要科水請食飯，唔知係咪因為咁，所以要諗清楚啲呢？