政情：民記「抽水會」 CY助籌三百萬
民建聯雖然幾年一次籌款，但係一籌就籌到二千二百萬元。特首梁振英（CY）都畀面到場，佢上台只係唱咗半首《讀書郎》就籌咗三百萬，喺特首選舉輸畀佢嘅唐英年就捐出一支六公升嘅法國波爾多名酒就籌得三十萬元，只係CY嘅十分之一，差距認真懸殊。
尋晚係民記廿周年籌款晚宴，佢哋嘅目標係籌一千五百萬元，唔怪得主席譚耀宗開場就話「今晚擺明抽水」啦。尋日嘅捐贈之中，譚耀宗同劉江華嘅字畫，合共籌得三百萬元，仲有中聯辦副主任李剛捐出嘅○八年奧運火炬，個火炬最後由「玩具大王」蔡志明投得。節目仲有民記創黨主席曾鈺成唱《紅棉》，太太跳舞，中聯辦副主任林武都有高歌。
不過講到掀起成晚高潮嘅，莫過於係CY上台唱歌喇，佢唱嘅係家傳戶曉嘅童謠《讀書郎》，不過唱到一半就停咗。
為咗唔好令善長仁翁失望，佢就動員到場嘅司、局長上台幫拖，其中以有「梁粉局長」之稱嘅發展局局長陳茂波最賣力。最後抽水大會喺肥媽領唱《友誼之光》下結束，大會一共籌得二千二百萬元，比起原本嘅目標，超額完成。