政情：朱經武登「台」做總校長
曾經做過香港科技大學校長嘅朱經武，離開香港後返咗美國繼續做研究，佢做科大校長期間，令科大嘅世界排名不斷攀升，喺國際上具有一定名聲；呢位已經七十歲嘅世界級學者，最近答應重出江湖，做台灣綜合大學系統總校長，仲講到明「不只是掛名，而是要能做點事」添。
由成功大學、中山大學、中興大學同埋中正大學四間大學組成嘅綜合大學系統，尋日舉行布達典禮，七歲已經由內地移居台灣嘅朱經武話，今次係抱住回饋嘅心出任呢個職位，佢希望四間大學可以喺現有基礎上更上一層樓，滿足台灣社會同經濟需要咁話。
大學聯合系統到底係乜呢？台灣大學數目多，要取得領導地位，某啲大學會組成聯盟，目的無非係想優勢互補，善用資源提升地位同排名。
朱經武大學行政經驗夠、名頭又夠響、籌款能力更加頂呱呱，由佢做總校長，四間成員大學肯定可以好快做出好成績啫！