政情：劉燕卿卸任 心急學韓文
下星期四就會卸任嘅消費者委員會總幹事劉燕卿，原來最近受聯合國貿易和發展會議邀請，出任新成立嘅消費者保障國際顧問專家小組主席，由香港「升呢」到聯合國，幫佢哋檢討有關保障消費者嘅守則，包括全球投資產品同互聯網購物等。但佢話唔心急做呢份工，希望留啲時間去學韓文，可以方便「煲韓劇」同聽佢最愛嘅K-POP（韓國流行音樂），不愧為「至潮」消費者！
劉燕卿尋日同傳媒舉行告別茶敍，回顧三十八年喺消委會嘅工作，可謂百感交集，形容呢份工既可幫到人、又有滿足感，同時仲充滿挑戰性，好似○八年雷曼迷債事件，佢哋一共收咗超過一萬宗投訴，「一個上晝就收到一千個投訴，辦公室連地下都坐滿投訴人，真係好誇張。」
佢又話，五年總幹事任期，最開心做到三樣嘢，包括《競爭法》、《一手住宅物業銷售條例》同修訂《商品說明條例》，佢話呢啲都係最佳嘅退休禮物。