政情：網民炮轟碧雲邪神
沙田區議會鞍泰選區補選結果塵埃落定，由民建聯招文亮以一千四百八十八票勝出。不過，選舉尚有餘波，更可能加深民主黨同其他泛民黨派嘅裂痕，事關盛傳會接任做民主黨主席嘅立法會議員黃碧雲（Helena），喺選舉結果公布後喺社交網站留言，暗批包括新民主同盟在內嘅其他候選人都係「民建聯B隊」，結果惹起軒然大波，留言、改圖、諷刺佢為「碧雲邪神」嘅網上專頁都應運而生，Helena人氣急升，成功繼民記鍾樹根同蔣麗芸之後成為立法會「新人王」。
話說今次補選中，民主黨游月華同新民主同盟陳珮明都有參選。兩個黨派選前已經爭拗不斷，各自聲稱扎根當區，又批評對方先至係空降嗰個，令泛民內訌成為選舉焦點。泛民分裂，結果益咗建制派，呢個係永不改變嘅定律，結果一如所料，招文亮以四十五票之差險勝游月華。
選舉完了，另一場戰爭先至開始。Helena肯定係唔忿輸，選舉有結果後不久，佢就喺社交網站話：「唉！Donna（游月華）只欠45票，輸給民建聯。真要多謝一眾民建聯B隊。泛民散沙一盤，等多一百年香港都唔會有民主，就算有，都係建制派贏晒！……」留言好明顯係針對由民主派分裂出嚟嘅新民主同盟。
結果各路網民群起攻之，不斷諷刺民主黨以為自己先係民主正朔，其他民主派都係建制派，但又唔記得自己靜靜雞去西環就政制展開談判。網民喺呢件事上面全面批評民主黨，話佢哋自以為是，同諉過於人等；新民主同盟立法會議員范國威亦發表聲明，話Helena嘅言論缺乏從政者應有胸襟，大家不應對選舉制度失去信心，應該尊重選民選擇。
刪留言徒然 不斷被瘋傳
至於Helena呢？事後好快已經刪去呢段留言，不過幸好早就畀人影低咗，仲將幅圖不斷瘋傳，又用佢原文嘅格式不斷創作。
其實民主黨九月立法會選舉大敗後，亦話過要韜光養晦，認清自己係細黨嘅事實，只可惜Helena一時失言，令到民主黨過去幾個月嘅低調變得毫無價值。Helena尋晚急忙道歉，話自己太過感情用事，願意收回啲言論喎。