中環出更：仇曼瑩眼光獨到 礦泉覓商機
美國投資大亨「商品大王」羅傑斯一早教路，投資致勝嘅秘訣係學好普通話。做證券行三十幾年嘅平和國際集團主席仇詩傑（James）同羅傑斯英雄所見略同，佢亦將兩個子女送去內地讀大學。大女仇曼瑩（Karen）先去英國及美國讀書，然後返家鄉寧波升讀大學，唔止普通話頂呱呱，連做生意視野都零舍不同。
普通話頂呱呱
日前James投資嘅米芝蓮食肆新斗記喺北角開新分店，James夫婦同埋大女Karen、細仔仇祖薰齊出動。Karen返寧波讀大學，細佬就去上海讀書，現時兩人都已畢業返港幫手。Karen話，爸爸希望佢識講普通話，同埋多啲了解家鄉。
James擅長揸鑊鏟，炒完股票炒粵式小菜，而Karen就關注健康及未來，打算喺年底代理德國生產嘅全天然能量飲料，又喺黑龍江馳名嘅五大蓮池附近嘅北安市興建水廠，將當地優質礦泉水帶畀關注健康嘅人，預料明年五月上市，正式進軍飲水業。靚女咁有心做實業，的確好抵讚。