中環出更：曾智明生日升呢三喜臨門
金利來太子爺曾智明（Ricky）登上主席寶座接掌港台青年交流促進會，上周六喺會展舉行理事會就職禮，順便慶祝十周年會慶。咁啱得咁蹺，Ricky翌日生日，近百位學生搞驚喜，趁散席時送上生日歌賀壽，查實壽星仔早前仲「升呢」做埋中總副會長，可謂三喜臨門。
Ricky人緣廣，佢就職，台灣政界猛人紛到賀，國民黨榮譽主席連戰長子連勝文、副主席蔣孝嚴姪兒蔣友松、榮譽主席吳伯雄公子吳志剛、台灣新北市議員陳明義等，紛紛由台灣飛到香港撐場，專程搭飛機嚟食飯，Ricky認真夠面子。呢班政壇富二代平日絕少喺香港公開亮相，今次登場，受歡迎程度不下於台灣型男吳尊，場內女粉絲車輪轉爭住合照，搞到幾位名人「無啖好食」，主人家惟有下令叫公關負責「擋駕」。
台灣美食至愛「燒雞屁股」
講起台灣，Ricky熟晒地頭，雖然家族未有生意喺嗰邊，但多年來熱心推動港台兩地文化及學生交流，稱得上係「台灣通」。數台灣美食，Ricky至愛係「燒雞屁股」嘞。
港台青年交流促進會今屆仲有兩位俊男副主席，佢就係金至尊數碼行政總裁吳傑莊（Johnny）及康泰旅行社太子爺黃進達（Jason）。Johnny十年前已去台灣嘅清華大學講IT創業，每次到訪台北，必定行士林夜市「掃街」，Jason就鍾情台式地道柯仔煎及麵線，風味十足，喺香港絕對食唔到喎。
近排商會陸續換屆，中總都有新氣象，福建幫頭領盧文端「升呢」做副會長，「牛仔褲大王」楊釗就榮升下屆會長，難怪兩人見面，爭住握手恭賀一番。
卓妮