一波未平一波又起，國民教育嘅炸彈仲未完全拆除，又有一個殺校炸彈殺埋身，炮聲隆隆，烽煙處處，教育局局長吳克儉左支右絀，疲於應付，如果今鋪又係拆彈無方，搞出個大頭佛，隨時執定包袱都得咯！
嗱，殺校炸彈真係唔講得笑o架，中學適齡人口下降，學界面臨縮班殺校危機，要求當局分三年逐步減少每班人數至三十人，以達到「零殺校」目標。當局點樣回應呢？出位咯，以「報」易「報」！你透過傳媒施壓吖嘛，佢就登報紙賣廣告，表明唔同意一刀切調低每班人數，吳克儉更加搬家長上枱，指唔少家長擔心減學額會影響子女入讀心儀學校機會喎。
當局搵家長做擋箭牌，教育界自然媽媽聲啦。二百二十幾名中學校長史無前例聯手反擊，強調如果當局一意孤行，將有超過一百間學校面臨縮班或被殺，有人仲要求特首梁振英介入，誓要逼當局就範。
嗱嗱嗱，二百二十幾間中學佔咗全港超過一半，真係非同小可，唔該教育局同學界坐低四四六六拆掂佢，無謂搞到滿城風雨，誤人子弟。咁講啦，當局自己都計過數，學生人數幾年後就會掉頭回升，依家殺校縮班盞攞嚟搞嘅啫，多一事不如少一事，小班教學已經係別無選擇嘅權宜之計，當局係咪應該從善如流呢？係咪應該靈活變通呢？
咪話功夫茶唔提醒當局，殺校炸彈殺埋身，處理不當定傷身，小班教學雖然涉及教育資源等問題，需要從長計議，但以目前嘅情況嚟睇，已經避唔到o架嘞。一來教育官僚都有眼睇啦，家陣中學生嘅中英文水平仲低過吳克儉嘅民望，小班教學不失為提升教育質素嘅過渡方案；二來咯喎，新政府風波不斷，行政會議成員林奮強被指偷步賣樓單嘢睇怕隨時演變成政治風暴，如果教育局死牛一便頸，引爆殺校炸彈，港府撲火都撲到氣咳啦，仲點樣強政勵治呀？仲點樣實現「穩中求變，適度有為」呀？
不過咁，學校方面亦要自我節制，絕對唔能夠做出輸打贏要嘅無品行為。今日學生減少要求零殺校，將來學生人數回升，如果學校又唔肯增加每班人數，甚至乘機要求增聘教職員，咁即係過橋抽板，盞教壞學生o架咋。
一句講晒，處理殺校須謹慎，切勿盲鬥誤蒼生。學生下降觸發殺校，可以話無可奈何，但如果當局同學界惡鬥，到頭來犧牲學生利益，咁就不可饒恕嘞。無論點都好，當局同學界一定要合力拆解呢個炸彈，唔好再搞到香港嘈喧巴閉，永無寧日啦！