政情：Madam盧突劈炮惹疑竇
每逢到咗年尾，警隊就會公布新一輪高層升職名單，加上前「二哥」李家超上月過檔保安局做副局長，同有多名高層相繼退休，騰出嘅助理處長職位的確唔少，好多人都想坐上呢幾個位。不過，就喺呢個時候，警隊就傳出港島總區副指揮官盧嘉敏日前突然辭職，下月中正式離任。
警隊中人盛傳，現職總警司嘅盧嘉敏仲有三年先退休，本來好有機會更上一層樓，成為女助理處長，但有人話佢可能收到風，知道自己行人止步，未必有得升，所以舉手請辭搵條好嘅下台階。但有熟悉佢嘅人話，Madam盧係因為健康理由請辭，唔係因為升唔到職或者其他人事問題，希望外界唔好亂咁猜測，仲話警隊有好多人才，一個走咗，仲有好多人可以接班，叫大家唔使擔心。
另外，亦有人話Madam盧嘅丈夫係有米之人，根本唔使憂，叫老婆提早退休做少奶奶，一啲都唔出奇。其實Madam盧向來好低調，喺近年做咗港島總區，要處理好多遊行示威，所以先至多咗曝光，個樣有啲似外籍人士嘅佢，頭髮啡啡哋，有排警隊嚴打染髮嗰陣，曾經有人懷疑佢啲頭髮係做咗colour，但就唔知真定假喇。