政情：開會坐得耐 EQ要針灸
好多人都話立法會嘅氣氛今時唔同往日，一方面議員數目多咗，你一言我一語，開會時間都長咗。雖然話議事廳座位已經特別訂造，相比以前啲座位舒服得多，但如果要馬拉松式開會，都咪話唔辛苦。據聞一向做開運動，而且去過南極行嘅民建聯（民記）葛珮帆（EQ）都話頂唔順，開咗個幾月會已搞到腰痠背痛，不時仲要搵中醫針灸治療。
EQ話，依家立法會會議時間未定，希望之後安排到時間，一星期去打一次泰拳。至於身為雙料議員，EQ慨嘆大部分時間用晒嚟開會，少咗同街坊見面，區議會方面實在難以兼顧，只好集中負責當中幾個事務委員會。九月立法會選舉，民記喺將軍澳嘅成績未如理想，民記開到聲要EQ未來做好將軍澳區嘅工作，但EQ就想先紮實沙田嘅地區工作，再專注處理將軍澳區嘅工作喎。