政情：「退保」不成局 泛民自作孽

內會尋日以廿四票贊成、廿六票反對、十票棄權，三票之差否決動議。教育界葉建源、工黨李卓人及公民黨兩位議員都冇出席投票。葉建源話，有學校臨時有嘢搵佢幫手，所以要早走；而公民黨兩位議員都話有嘢做投唔到票，至於李卓人就去咗外地開會唔喺香港。雖然佢哋四個都各自有自己嘅理由而未能投票，但佢哋嘅選擇已將全民退保問題放喺次要位置，唔怪得有人鬧佢哋講一套做一套喇。

工聯唔畀工黨搶風頭

反對成立小組委員會嘅民建聯主席譚耀宗話，退休保障呢個議題可以喺扶貧小組委員會上討論，又話如果成立多一個小組委員會，但討論嘅議題差唔多嘅話，只會加重秘書處工作負擔。投棄權票嘅工聯會就話同意設立小組委員會，但覺得小組委員會應該隸屬於福利事務委員會之下，又話會再次喺福利事務委員會上重新建議成立退休保障小組委員會喎，好明顯係唔想畀工黨搶咗全民退保議題嘅風頭啦！

提出建議嘅張超雄話，雖然內會轄下已經成立咗扶貧小組委員會討論點樣可以幫貧窮人士脫貧，但佢認為扶貧同退休保障係兩碼子嘅事，唔明政府點解將兩件事混為一談，所以覺得內會應該再成立多個退休保障小組委員會討論事件。佢又話，小組委員會嘅討論內容應該超越扶貧範疇，又建議委員會討論訂立貧窮線，以及研究如何優化強積金。