問：主持人或中大學生 林：林鄭月娥
問：不信任問題在董建華和曾蔭權上場時沒有那麼嚴重，大家為何不信任梁振英？
林：我都有留意呢一場（特首）選舉，選舉期間有人認為梁先生可能係「地下黨」、「共產黨」，所以對佢有某啲猜疑，我自己親眼見得到、親耳聽得到梁先生工作，佢都係以香港人利益為出發點。
問：你上任至今數個月，有否做過違背良心嘅事？如果十分代表你完全對得住天地良心，零分係完全違背良心，你會畀自己幾多分？
林：我肯定係十分，我唯一就係希望透過我呢個工作崗位（政務司司長），本着良心服務市民，為香港做多一件事就得一件事咁嘅態度，如果係去到違背良心，根本呢個職位係唔值得我留戀。
問：政府會否按泛民主派嘅要求妥協，令長者更快拎到津貼？
林：如果純粹係因為拎夠票去作出妥協，接受根本不可成立嘅理據去改動計劃，帶來龐大公共資源負擔，呢個係完全不負責任做法。
問：創立新嘅中港矛盾，例如為內地富豪服務嘅新界東北融合計劃？
林：呢個係無稽之談，新界東北計劃係開拓土地嘅工作，當然喺開拓土地時會動搖到一啲既得利益，所以佢哋有焦慮有不滿，政府要處理。
問：龍尾泳灘破壞生態，其實沙灘多一個唔多，能否取信於民停止呢？
林：點解依家先咁強烈反對，係咪因為臨門有保育人士反對，所有以前嘅嘢可以推翻，如果可以隨便推翻咁多嘅論政同訴求討論，呢個係咪香港應該認同尊重嘅施政態度呢？
問：創新就係創立同實施「洗腦式國教」？
林：國教整個政策工作係一件洗腦工作，不但同事實不符，亦不會發生。有教協把關及監察下的教師，點會樂意做政府嘅洗腦工具。
問：你樂唔樂觀二○一七年各界達成共識，落實一人一票選特首？
林：即使一個為長者紓緩措施，都被發展成富爭議性，我今日坐喺度無呢個信心去話畀你聽，喺更加可能係意識形態或理念分歧較大嘅課題可以做到呢樣嘢。
問：改變一直對法治和監察嘅堅持，好似林司長話廉政公署會阻礙行政機構運作？
林：我不會亦不可能講啲說話做啲嘢，影響維護香港核心價值嘅重要監察機構。
問：你對於八九六四屠城究竟有乜睇法，你支唔支持「平反六四」呢？
林：好老實講，今日坐喺度係特區主要官員，我實在有些題目不方便公開發表自己睇法，希望大家諒解。
問：梁振英當選特首後掂行掂過不答提問，要記者提及先行番轉頭。
林：事實擺在眼前，現屆政府開記招、回應傳媒同發放新聞方面，都做得相當進取。