立法會尋日舉行答問大會，新民黨議員田北辰問咗特首梁振英一個幾有挑戰性嘅問題：能否在任內提升港人英文水平？田議員引用一項研究，香港嘅英文水平喺亞洲排第七，已經被日本同南韓超前。所以田北辰就話嘞，香港要保持國際城市地位就要有具體措施，例如規定行政會議每隔一個月講英文開會。
莫講話英文水平技不如人，就算作為母語嘅中文都非常麻麻。香港考試及評核局公布全港性系統評估報告，中文科有百分之八嘅中三生，雖然六年前達標，但今年再考就肥佬。中三學生中文科表現參差，寫作一般只識用逗號同句號，連分號同頓號都混淆。學生哥嘅錯別字更加係多不勝數，平均每篇作文出現五個錯別字，例如「支援」誤寫「枝緩」，「勤奮」誤寫「勤舊」。至於文憑試中文科嘅考生咯喎，錯別字同樣十分普遍，「待人接物」竟然會變成「待人接吻」。
行政會議講英文無疑有一種聊勝於無嘅示範作用，不過計功夫茶話齋，唔該本地官場同政壇有頭有面嘅大人物以身作則，千祈唔好教壞細路。喂，如果權貴階級開口夾着脷，遣詞用字都錯漏百出，小朋友或者會諗，做個唔識字嘅文盲都冇乜所謂吖，長大成人之後照樣可以飛黃騰達。萬一身為未來主人翁嘅學生哥從此懶惰成癖，點樣保持國際城市地位呀？
呢嗱嗱嗱，權貴教壞細路嘅例子真係汗牛充棟o架，遠嘅唔講嘞，就講立法會新進議員鍾樹根吖。呢一個民建聯力捧嘅政壇新星真係錯完可以再錯o架，佢老哥嘅卡片將中華人民共和國嘅英文寫成the People's Republic of Hong Kong，無啦啦搞出一個「子烏虛有」嘅「香港人民共和國」。因乜事幹係「子烏虛有」而唔係「子虛烏有」？原因係綽號Tree根哥嘅鍾樹根出口成文亂拋書包，一噏就噏錯咗「子烏虛有」。
鍾樹根未錯完o架，「焚書坑儒」寫成「焚書坑孺」，工作地點係「主法會」，而且時空交錯去咗「澳門立法會」打工。Tree根哥出錯能力之強，簡直青出於藍勝於藍，當年一句「搓Our Breast」技驚四座嘅黨友陳克勤都甘拜下風。
大家記唔記得前特首曾蔭權當年亂噏「身同感受」呀？從此呢一個錯誤版本嘅四字成語不斷誤導蒼生，反正你講正確嘅「感同身受」隨時受到質疑。呢家嘢，咪就係權貴教壞細路嘅典範囉，該煨！
講開又講吖，連犯幾嘢低級錯誤嘅鍾樹根失驚無神做咗港大校董，會唔會佗累學生哥語文水平進一步低落o架？惟有祝港大學生好運咯！