行政會議成員林奮強賣樓大賺被抽秤，佢最初好威武咁解釋佢嘅投資之道，重複咁講，不厭其煩，後來被問及佢將賣樓差價當佣金咁畀咗地產代理，有可能違法，佢摷咗一輪文件，同太太傾過後，尋日又有新版本，話將差價捐去慈善基金，又話放盤由太太負責，佢自己參與唔多。太太終於出場嘞。逢係政治人物遇上麻煩，最後都由老婆做擋箭牌，可見賢內助之重要，否則喺重要關頭，槍林彈雨，仲有邊個可以救自己，風雨同舟卸卸力？
