立法會選舉開支申報仲有唔夠兩個星期就屆滿，各地方選區同功能界別候選人都開始提交申報。
其中喺港島區參選嘅福建幫許清安雖然只取得二千九百八十票，但就用咗足足一百六十四萬八千七百七十七元四角，計落每票要五百五十幾蚊，絕不合乎成本效益。
港島區吳榮春用錢同得票都比許清安少，用十五萬幾拎到四百二十二票，每票約三百五十六蚊。吳榮春開支裏面用得最多係信封，用咗九萬蚊印三十六萬二千個，數量大，但效用細。相對之下，九龍西黃逸旭就抵啲，用接近三十萬取得二千三百九十九票，每票一百二十三蚊咁上下。
功能界別方面，喺金融服務界僅輸幾票畀張華峰嘅「梁粉」李君豪，用咗約三萬七千六百四十五蚊，同張華峰嘅開支差不多；佢宣傳用得最多係發手機短訊，充值足足四次，每次一百九十蚊。李君豪點票當晚，原來喺機場某酒店租咗間房作為選舉辦公室，一晚承惠三千三百蚊！