政情：范國威貼紙宣傳疑違規
「雙料議員」范國威（Gary）當選立法會議員後知名度大增，但代價就係一言一行都畀人全方位監察。最近有人向我哋報料，Gary喺立法會選舉前後，曾喺至少四款介紹政府政策嘅小冊子及單張中，貼上有個人簡介同肖像嘅貼紙，有個別貼紙仲貼正負責製作該本小冊子嘅政府部門之上，難免令人懷疑有關內容係咪佢有份出品。我哋曾就此致電Gary查詢，惟截稿前都未獲回覆。
有資深地區人士形容，倘議員有意傳遞政府訊息予市民，佢哋嘅普遍做法係自行印製單張，將有關單張內容轉載，事實上有區議員曾因喺區議會印製嘅月曆上貼宣傳自己嘅貼紙，事後畀區會同事譴責，唔知Gary會否吸取前人嘅教訓呢？
同樣畀人踢爆涉嫌違規嘅仲有西貢區議員方國珊。西貢區議會最新文件顯示，方國珊係選舉前後違規掛橫額嘅常客，最高峰時期違規嘅橫額、海報等數目總和達廿四個。方國珊回覆時堅拒為此道歉，反指「違規有理」，重申自己係為市民服務喎。