政情：梁卓偉精通管弦貢獻樂壇
前特首辦主任梁卓偉（Gabriel）自卸任之後，除咗返回香港大學重執教鞭，仲做番佢另一老本行，即係音樂。尋日政府公布咗新一屆香港管弦協會董事局成員名單，當中有兩位新委任嘅成員，本身好有音樂天分嘅Gabriel係其中之一。
香港管弦協會係香港管弦樂團嘅管理機構。Gabriel可能離開咗政府，有更多時間貢獻樂壇。佢嘅音樂之路真係唔簡單，佢遺傳咗音樂老師媽媽嘅音樂細胞，四歲就學鋼琴，做過男童女高音，喺加拿大攻讀醫科時同時副修音樂碩士，現任香港兒童交響樂團客席指揮。Gabriel從政期間，都無停過演出，好似佢喺母校華仁書院舉行周年校慶時，就曾經指揮過樂團演奏，又喺過唔少慈善活動上彈奏鋼琴。
名單上嘅新成員，仲有永亨銀行董事長兼行政總裁馮鈺斌。