政情：新丁初試「提」聲冇料到
新一屆立法會尋日舉行首次答問大會，特首梁振英（CY）總共答咗十八位議員嘅問題，內容遍及本港政治、經濟同社會議題。各個黨派為咗等新人喺呢個重要場合上初試啼聲，都不約而同搵黨內新人上場打頭陣，等佢哋可以趁機表現自己。不過觀乎眾新丁表現，就會發覺佢哋嘅發言內容唔夠聚焦搶唔到風頭，睇嚟各黨真係要加把勁訓練後輩，等佢哋下次可以表現得好啲喇。
喺十八個提問議員入面，有十四個都係新人，當中大約一半屬於功能組別。工程界盧偉國（WK）雖然搶閘問到第一條問題，但佢竟然無好好把握機會，一開始就用CY競選政綱「穩中求變，適度有為」幫政府講好話，又問政府會唔會為基建發展制訂長遠規劃，同埋優化相關諮詢機制。
做過九鐵主席嘅新民黨副主席田北辰面對大場面理應氣定神閒，但佢尋日提問時自爆，輪到佢發問但未寫好講稿。正當大家以為做大生意嘅佢會關心外圍經濟情況時，佢竟然問CY上任至今有無推行政策改善港人英語質素，又問CY願唔願意接受挑戰，要求行會每次開會都講英文喎。
慢必照稿讀顯生硬
人民力量陳志全（慢必）就話依家立法會啱啱開始，同事連「櫈都未坐暖」，政府就要攞啲老人家做人質同立法會玩「show hand」，喺長者生活津貼上企硬唔肯畀多一個月追溯期，搞到行政同立法機關關係變得緊張。慢必之後又用「非不能也，實不為也」鬧CY唔肯喺呢件事上為老人家開先例，雖然佢都算講得唔錯，但略嫌照稿讀有啲生硬，睇嚟下次都係背熟啲好啲。
雖然各新丁表現一般仍需努力，但各黨元老級人馬表現就令人眼前一亮，梁家傑（Alan）就大鬧CY今次為咗令財委會喺十月底前通過撥款，不惜硬闖福利事務委員會，又批評佢目中無人嘅態度已經唔係第一次見。雖然Alan鬧足CY幾分鐘，但CY仍然氣定神閒咁話財委會愈遲通過撥款，老人家就會愈遲攞到錢，絲毫無被Alan嘅咄咄逼人所影響。