中環出更：癲價搶貴租 楊貫一迫遷

當日一哥專登去撐契女兼入室弟子陳玲玉嘅場，有「國家非物質文化傳人」封號嘅陳玲玉，藝術造詣高深，是夜自彈琵琶，獻唱經典粵曲，博得滿堂彩。講起生意經，一哥最頭痛嘅莫過於要搬舖，雖然政府出招只係針對住宅物業，但佢希望商舖租金都有機會回落。約半年前，有租客向業主漫天開價搶租，依家富臨交緊七十萬元月租，但叫價已去到一百三十萬元、一百七十萬元，搞到一哥冇晒心機，打定輸數搵新店搬。一哥語重心長話，政府真係要做啲嘢穩定租金市道，連佢做鮑參翅肚生意都唔夠交租，何況一班小商戶呢？

黃家和引入法國黑雞

香港餐飲聯業協會會長黃家和（Simon）同埋紡織及製衣界立法會議員鍾國斌一齊現身，兩人仲搞爛Gag話，見到佢哋兩個就衣食無憂。Simon啱啱喺法國返來，此行專程去落實代理法國知名嘅有機走地黑雞。佢話呢隻雞好出名，肉質彈牙鮮美，特徵係頭頸後面冇咗一忽雞毛，好得意。雖然價錢貴過港產嘉美雞，但係相信食得夠奄尖嘅香港市場，不乏捧場客。

鍾國斌（左）與「糖薑大王」孫女余皓媛（中）老友鬼鬼，右為黃家和。

張震遠（左二）現身為山東老鄉趙振國（中）送上祝賀。右起：協會副理事長黃經國、理大校長唐偉章，左一為協會理事陸詠儀。

卓妮