中環出更：甜蜜啟剛 歎平民早餐
出身大富之家，都未必餐餐食得招積，好似正準備下月迎娶「跳水公主」郭晶晶嘅霍英東家族長孫霍啟剛，上周五就被卓妮遇到佢喺上環信德中心歎麥記平民早餐。家教甚嚴嘅啟剛，有規有矩咁跟住排隊買咖啡，未瞓醒嘅顧客分分鐘睇漏眼。
啟剛當日着住直紋白恤衫襯黑色西裝，臉上掛着招牌陽光笑容，見佢瘦咗好多，成個臉形尖晒。卓妮上前打招呼，問佢係咪因為準備結婚而減肥？佢笑住答話唔係，為咗健康就真，但近期準備婚禮的確好忙。咁婚禮搞成點？佢笑笑口賣關子，唔肯多講兩句。據知啟剛將於下月八日，喺沙宣道霍家大宅舉行婚禮註冊儀式，由梁愛詩擔任婚姻監禮人。
積極籌備爺爺紀念館
雖然結婚令啟剛忙到瘦，但係佢都不忘工作，最近就頻密出入南沙，籌備喺當地建設一座霍英東紀念館。
啟剛話，為咗令紀念館嘅內涵更豐富，佢訪問咗好多爺爺生前嘅老朋友，聽聽埋埋好多阿爺鮮為人知嘅事迹，深受感動，仲因此而增進對阿爺嘅了解添！