中環出更：陳偉南「第一次」獻嶺大
唔少經濟拮据嘅大學生都冇錢住宿位，「飼料大王」屏山企業董事長陳偉南就喺嶺南大學成立「陳幼南博士助宿金」留本基金，資助學生住宿及改善學習環境。嶺大日前就將一間新校舍命名為「陳偉南會堂」，身兼潮屬社團總會創會主席嘅陳偉南獲一眾「潮人」現身到賀，本身都係「家己冷」嘅嶺大校董會主席陳智思（Bernard）笑言，以為自己去咗潮州商會活動。
家有喜事，陳氏四代家族成員齊捧場，陳偉南公子陳幼南夫婦、孫女陳佩君（Constance）及孫女婿蕭猷迪抱埋曾孫Miles現身，仲有陳幼南兩個表弟林家權、林家雄一家都喺度，咁啱呢日係Miles兩歲生日，好事成雙。
陳偉南話，今次係佢首次捐助本港大學，之前已經喺家鄉捐款逾億元，佢話自己出身富裕，亦冇經歷過刻苦嘅求學生活，所以想為社會作貢獻。
早年喺美國修讀心理學及教育嘅Constance，本身係英文科教師，佢話依家嘅學生好早熟，填鴨式教育已經過時，要用活動教學嚟提升學生嘅學習興趣。唔少家長都望子成龍，早早為仔女安排興趣班同學前教育，Constance就建議大家順其自然，唔好畀小朋友太大壓力，影響心智發展。
嶺大搵新校長 重教學理念
嶺大校長陳玉樹日前宣布提早退休，Bernard話，學校將成立遴選委員會，年底開始全球性招聘校長。對於同期有香港大學物色新校長，問Bernard會否提高薪酬作招徠，佢就話請校長唔同商界請人，唔係話單靠人工吸引人才，要雙方有一致嘅教學理念同熱誠喎。
卓妮