香港樓市畸形發展，樓價同租金都貴到唔係人咁品，所以財金官員先至出招打擊炒家，既將額外印花稅加碼，又新設買家印花稅，企圖趕絕非本地買家。如果想進一步穩定樓價，好多人都認為有必要增加土地供應，平衡供不應求嘅情況。照咁講，身為全港最大地主嘅特區政府，係咪應該撥地起樓呀？
講就係咁講啦，問題係特區政府有太多九品芝麻官以及極品烏龍官，連手頭上有幾多地皮可用都烏瀡瀡又矇查查。唔信官老爺真係懵到上心口？睇下發展局點樣擺出一個大烏龍啦。
負責房屋發展嘅發展局兩星期前公布一份「空置住宅官地」嘅圖則，顯示共有三百九十一點五公頃土地儲備可作住宅發展用途。點不知傳媒踢爆，所謂土地儲備原來係大量發水，圖則標示嘅住宅官地錯漏百出。政務司司長官邸呀，財政司司長官邸呀，律政司司長官邸呀，竟然離奇地被列入土地儲備。喂，莫非三司官邸會夷為平地重建為一幢一幢公屋？咪玩啦，功夫茶打死都唔信呢幾座歷史建築物會清拆重建囉。
除此之外，所謂土地儲備又包括剛剛落成一年幾嘅公共屋邨同埋已售出嘅限呎地，甚至架空鐵路底下嘅花槽，都當成可作住宅發展用途，錯到離晒大譜。專業人士分析過，政府實際可建住宅嘅官地面積介乎一百五十至一百九十公頃，較官方數據三百九十一點五公頃縮水一半以上。以每年公私營房屋需求五萬個單位計算，百幾公頃土地只夠應付兩年左右。
咁即係點？即係發展局變咗發水局，數據不盡不實，非常之咁搵笨。
呢嗱嗱嗱，你話係咪死得吖？呢頭出招話要穩定樓市，嗰頭被踢爆土地儲備言過其實，可作住宅發展嘅地皮原來少得咁交關，地產商隨時又吊高嚟賣，樓價同租金話唔定居高不下，蝸居一族幾時先至有機會掹車邊榮升業主呀？誠如立法會房屋事務委員會主席王國興話齋，政府公布嘅土地數據有好多水分，令公眾擔心及恐慌，政府一定要盡快修正圖則，畀市民憑藉準確資料探討長遠房屋策略。
所以話啫，極品烏龍官真係害人不淺o架，你以為樓市有可能因為政府抽重稅而停止屢創癲價啦，哈，土地儲備竟然大幅縮水喎，你話係咪無所適從吖？唔通真係打啟德體育城主意咩。講真吖，與其將啟德體育城改為興建住宅，倒不如真係將三司官邸夷為平地再打造廣廈千萬間，最低限度體育界會順氣少少，唔會吹雞呼籲運動員上街示威。
好心發展局唔好再做發水局，切切實實交出準確數據，唔好搞到連財金官員都被搵笨吖嘛！