會計界立法會議員梁繼昌（Kenneth）一直係負責規管地產中介人嘅地產代理監管局成員之一，但政府上星期公布新一輪任命，做咗兩年成員嘅Kenneth冇得續任，換上民建聯中西區區議員張國鈞取而代之，反而衞生服務界議員李國麟就可以繼續留任，政圈內就流傳Kenneth因為泛民主派背景而被叮走。
不過，Kenneth就解釋，自己絕對冇被叮走，反而係佢覺得入咗立法會後應該多咗好多工作，擔心唔可以同時兼顧太多公職，於是喺當選後去信地產代理監管局主席陳韻雲，解釋自己遲啲會忙到連會都唔得閒開，所以惟有忍痛放棄成員身份，專心做好立法會呢份工嘞。
Kenneth仲話，明年四月亦會放棄埋房委會委員身份，但會保留監警會委員一職。佢話自己喺地產代理監管局有豐富經驗，將來完全適應立法會工作後，唔排除會加入多啲公營機構幫手喎。