政情：黃靜文叻女多人爭

七月一日後，Adeline就離開咗問責團隊，但其實政制及內地事務局局長譚志源一直想搵番Adeline回巢。雖然譚志源出盡辦法力邀，聲言已經燒晒所有返工衫同捐晒所有手袋嘅Adeline，始終亦不為所動。我哋聽聞，連公營機構都對佢有興趣，負責招聘平機會主席嘅獵頭公司，原來唔止搵咗失明人士莊陳有，仲搵埋Adeline參與遴選，但伊人肯唔肯做就另一回事喇。

女高官入商會蔚然成風

究竟仲有咩人向Adeline招手呢？答案就係最識得「投資計數」嘅商界人士喇。據聞香港廠商聯合會現任行政總裁梁世華稍後任滿後可能唔玩，所以有人已諗定接替人選，一諗就諗到長袖善舞嘅Adeline。據聞一切斟介都仲喺好初步階段，各方回應的時候都小心翼翼，睇吓最後可唔可以修成正果嘞。

其實官場叻女加入大商會，已經蔚然成風，最早有前政務司司長唐英年嘅前愛將袁莎妮加入香港總商會做行政總裁，最近又有商務及經濟發展局常秘蘇家碧加盟工業總會做總經理，過完冷河之後就會擢升為行政總裁。如果廠商會請埋Adeline，就真係成為官場佳話喇。

點解政府高官喺商界咁吃香呢？事關班高官對政府架構同運作瞭如指掌，而商會就負責代表商界，如果商會入面有個政府中人幫手度橋，咁第日同政府交手談判時，就知道對方葫蘆裏賣咩藥。依家政務官不時搵好工跳槽，有規模嘅機構隨時請到眉精眼企嘅叻人，同以往只能打退休高官主意，年代已經唔同。

眼仔睩睩嘅Adeline，喺許仕仁做政務司司長時，係許嘅政務助理，今年四十八歲。做副局長前佢係民政事務總署副署長，佢係少數識政治嘅政務官，懂得同傳媒相處。今屆唔留喺政府據聞係唔想原地踏步再做副局。究竟今次份工傾唔傾得成，且看下回分解。