「立法會選舉結束後嘅第二日，就係部署下一次選舉嘅開始。」講呢句話嘅係民建聯副主席劉江華（劉華）。
民建聯尋日早上舉行咗個分享會，由各參選隊伍分享選舉經驗，參選超級議席落敗後都無公開露面嘅劉江華亦有出席。聽聞劉華喺會上講咗佢自己選前已預料到會輸嘅三大原因，唔少與會者仲聽到弦外之音添。
劉華預料到自己會輸嘅三大原因：第一、係佢自己講錯嘢，畀人「柴台」，但佢話呢樣嘢冇發生過；第二、係因為全世界都覺得佢贏，所以無投票，呢點應驗咗；而第三、就係如果同各區結合得好啲，佢就唔會輸，所以下次一定要做到無縫結合。同邊個結合得唔好呢？佢就無講嘞。不過今次選超級，佢獲分配到新界東同西掘票，唔通佢講緊嘅係同呢兩區分區直選嘅候選人結合得唔好？
除咗劉華嘅分享之外，仲聽聞有人半認真咁話，新界西贏得三個議席，全靠公民黨嘅幫忙喎。梗係啦，公民黨吸晒啲泛民票，咪搞到其他泛民候選人雞毛鴨血囉。