政情：錢果豐邱誠武 爭先恐後衝終點
一年一度嘅港鐵競步賽尋日喺中環遮打道舉行，一眾城中名人當然趁機參加「港鐵主席邀請賽」，大展身手。賽事中尤其以運輸及房屋局副局長邱誠武同港鐵主席錢果豐鬥得最激烈，兩個人喺賽道時可謂「叮噹馬頭」，到最後臨衝線時一百米，兩個人仲身貼身你一步我一步，鬥快衝終點。
邱誠武臨衝線時，身體仲大幅度咁左扭右扭，手都舉起埋，希望身體擺動幅度大啲會行得快啲，不過可惜最終都係以一步之微，輸咗畀錢果豐。不過佢哋都唔係爭緊冠軍，因為冠軍輪唔到佢哋喇。
呢場「港鐵主席邀請賽」吸引咗幾十個城中名人參加，除咗邱誠武同錢果豐之外，仲有行政會議成員張震遠、立法會議員謝偉俊、馮檢基等，由運輸及房屋局局長張炳良做主禮嘉賓。不過參賽嘅一眾高官、議員可能平時頭腦口才就好叻，但運動細胞就差啲，行得好慢，過終點時全部都喺中後位置，真係要多啲鍛煉！