政情：阿牛絕食 輕咗七磅
五十七歲嘅保釣行動委員會成員曾健成（阿牛）做嘢瞓身又搏命，每次同班後生仔出去示威，佢都係行到最前。阿牛近日又以民間電台台長身份絕食。阿牛共絕食咗一百一十幾個鐘，即係差唔多五日無食過嘢。阿牛話最大成功係輕咗七磅，連個「牛腩」都瘦埋，算係意外收穫。
無論係去保釣定去中聯辦，阿牛嘅大肚腩都係最易認嘅標誌。但前日我哋喺社民連黨慶兼籌款晚會上，見到瘦咗一個碼嘅阿牛，原來佢早排因為絕食而瘦咗六、七磅。阿牛仲話，雖然突然間瘦咗幾磅，但唔怕對健康有影響，反而覺得個人爽咗，行步路都快啲。其實阿牛年紀唔輕啦，絕食要諗清楚呀。
講開阿牛，其實佢喺社民連入面都算德高望重，早排傳緊社民連同工黨合併，阿牛第一個舉手反對，仲講明話合併後即刻拉隊走人，就係佢呢句搞到黨內無人敢再提呢件事。工黨張超雄嗰日去撐場，都無提合併嘅事。