政情：高永文自爆爬樹睇雀仔
咪睇食物及衞生局局長高永文一介書生，原來為咗睇雀佢會爬樹。
高醫生尋日出席「傑出青年協會傑青健體嘉年華」，喺台上同一眾傑青拉完筋做完熱身，落台就同記者一齊「想當年」，原來高醫生當年仲係學生哥嘅時候主力踢波同打乒乓波，雖則打波技術未必係最精，不過打波策略喇喎，高醫生話佢都有番兩招o架，咁啱尋日「乒乓孖寶」李靜同高禮澤都在場，咁好機會梗係要「高手過招」啦，不過高醫生就話自己費事獻醜而婉拒。
高醫生解釋，做運動最緊要係符合自己興趣同體能，就好似佢咁，依家已做唔到劇烈運動，所以就去行山，仲大力推銷行山觀鳥都係運動嘅一種。高醫生仲話，有時為咗睇雀，仲會爬樹添！近日啟德體育城搞到滿城風雨，高醫生就話，佢梗係支持起體育城啦，不過都仲係要搵地起樓o架喎！