政情:白鴿黨選主席一鑊粥

民主黨(白鴿黨)十二月召開黨員大會選新主席,接替因為立法會選舉失利而引咎辭職嘅何俊仁。早前有風聲話黨內主流派推舉立會新丁黃碧雲接任,以便該黨進行改革,重新上路。但據聞黨內有唔少人認為黃碧雲經驗唔夠,又擔心佢講嘢過激容易闖禍,反建議由非主流派嘅涂謹申、或者近年新入黨嘅劉慧卿或尹兆堅接棒,而最近更有聲音推舉已退居幕後嘅張文光做主席,總之就係無人領導,群鴿亂飛。

何俊仁辭職後按常理應由兩名副主席單仲偕或劉慧卿頂上,不過大家都覺得前者個性軟弱,難以喺逆境中帶領個黨由低位反彈,而後者早前已經公開表明自己唔熱衷黨務,唔會出選主席。所以主流派早前就吹風話應由新人接任主席一職,喺該黨兩名立會新丁黃碧雲同胡志偉之間二揀一。不過胡志偉雖有多年區議會同前市政局經驗,但喺選舉論壇上嘅表現差強人意,而出名駁嘴第一嘅黃碧雲就掉番轉,有黨中人就話,黃碧雲連區議員都未做過,予人經驗不足、唔夠穩重嘅感覺。

張文光堅持退居幕後

由於兩位新丁都畀人覺得未夠班,竟然有人諗起已經唔係立法會議員嘅張文光。張文光喺黨內一直致力培訓新人,故此得到唔少「乳鴿」擁護。我哋亦問過張文光,佢就話白鴿黨大敗係一個千載難逢嘅契機可以換人上位,而佢自己心目中已經有「換人時間表」,就係二○一六年黨高層要畀晒新人上位,二○二○年立法會就全面換班,所以佢依家只會退居幕後培訓年輕一輩,仲話「太多眷戀、太多遲疑係唔得嘅」。

涂謹申係可能嘅選擇

除咗張文光,亦有人提議由近年先由街工入黨嘅葵青區議員尹兆堅,或者「超級票王」阿涂接棒。連立法會議員都唔係嘅尹兆堅地區工作經驗豐富,表現穩重。不過如果尹兆堅做咗主席,下屆選舉就肯定要力捧佢出戰新界西,咁就會影響屬主流派嘅李永達同陳樹英夫婦再戰新西嘅機會。主流派基於自身利益,未必願意支持。反而阿涂曾經反對政改方案、力撐「五區公投」,喺蜀中無大將嘅情況下,都可能係一個選擇。張文光話白鴿黨大敗係一個千載難逢嘅契機可以換人上位,不過連主席都無人適合做,究竟白鴿黨可否翻身,真係好難講。

第一手消息請下載on.cc東方互動iPhone/iPad/Android/Windows Phone Apps