中環出更：唐貝詩孖住「手袋救星」搞團購
香港靚女經常追款買名牌手袋，係貪新忘舊？未必。「手袋救星」旭新社創辦人潘穎安（Anson），由職業足球員轉行做皮具清潔復修，睇遍手袋嘅奇難雜症，佢話，好多人家中收埋好多污糟失色手袋，但未至於破損，只係唔知點保養護理。難怪團購網站「喵擊」行政總裁助理、名媛寇鴻萍嘅大女唐貝詩（Lydia）都搵佢合作，搞超平團購益吓城中姊妹。
賣西班牙保護噴霧
早前Lydia特登拎住七、八個名牌手袋及銀包，去搵Anson急救。Lydia話，Anson係行內始創者兼一哥，所以摷晒家中舊手袋去大變身，仲打算拍住旭新社搞團購，頭炮係原價出售嘅西班牙防水防污噴霧。
咪以為Lydia經常出入派對，好似唔憂做，其實佢落足心機搞呢盤網上生意，運作剛滿九個月已收支平衡。小妮子立志將網站搞成百貨公司，明知飲食類產品最受歡迎，但係都唔肯捨難取易，繼續頻撲蒐羅靚嘢，挑戰難度嘅精神值得一讚。