中環出更:玩具大王睇好樓市會再升

政府突然出辣招為樓市解溫,嚇窒唔少闊綽內地客。後市會否大跌,無人睇得通。不過坐擁唔少豪宅及商舖嘅玩具大王蔡志明就定過抬油,認為壓抑措施對樓市影響短暫,待買家消化有關消息後,樓市又會熾熱過。

沙田馬場尋日舉行「東方表行沙田錦標」,身為「喜運佳」鐘錶集團老闆嘅蔡志明同太太蔡李惠莉齊撐場。講起各大屋苑睇樓量應聲急跌,蔡生不忘為樓市把脈。佢話,措施短期會有心理影響,相信樓市會淡靜一兩個月,樓價亦唔排除會跌百分之三至五,但始終市場熱錢太多,喺銀紙貶值下,買磚頭最保值,認為樓價好難大跌。

「喜運佳」常務董事梁青華都妙論樓市,笑言炒香港樓限制多了,反而益咗高檔消費品,事關內地豪客水頭充足,唔炒樓,可以炒手錶,一些具收藏價值嘅限量版手錶,升幅隨時媲美買樓喎。

揸咗唔少工廈及商舖嘅工總副主席劉展灝就指壓抑措施不利投機者,但對投資者就無影響,若然樓市回落百分之十至二十,會吸納優質物業長揸。

楊明標有乖仔幫手

東方表行主席楊明標都話靠內地貴客「食胡」,佢哋喺內地有成近四十間舖,有十幾億人「射住」,生意有排做嘞。不過標叔話,剛過去嘅十‧一黃金周,旺丁唔旺財,加上香港舖租已經太貴,嚟緊業務會穩步發展,未敢大事擴充。東方表行依家由公子楊衍傑(Dennis)任董事總經理。兒子九二年由加國返港,眨眼幫咗老竇廿年,佢似足爸爸一樣勤力,標叔大可印印腳退休嘞。

卓妮

第一手消息請下載on.cc東方互動iPhone/iPad/Android/Windows Phone Apps