大家聽過白沙澳未？如果未聽過，咁大浪西灣呢？應該記憶猶新嘞啩，兩年前呢個「香港十大勝景」之首慘遭入侵破壞，環保官僚居然懵然不知。如果當時唔係群眾力量喝停工程，呢塊生態樂土可能變咗富豪私人俱樂部咯。
嗱，白沙澳同大浪西灣有好多共通點o架，同樣位處西貢，同樣山明水秀，同樣係高生態價值土地，而最似嘅就係，兩個地方同樣面對生態災難！
環保團體踢爆，白沙澳鄰近郊野公園一幅淡水濕地遭到大規模挖掘，寧靜鄉郊淪為挖泥地盤，生態寶地變成泥頭工地。呢，大浪西灣事件中咪有人假「美化種植」之名大興土木嘅，白沙澳濕地嘅命運都差唔多，本報記者現場直擊，發現有三部挖泥車進駐，受到挖掘破壞嘅面積足足有兩個標準泳池咁大，外圍就豎咗個「三好農場」嘅標示牌。
香港後花園嘅生態樂土再次失守，唔驚就假，而最得人驚嘅係，原來白沙澳過去兩年間已經被發展商悄悄入侵，大部分農地相繼被私有化，一個生態寶庫就咁唔經唔覺變晒富豪私人俱樂部。唔同嘅係，大浪西灣打算起豪宅別墅，而白沙灣可能起村屋龕堂，講到大殺風景，今次肯定比上次有過之而無不及。
面對環保團體及傳媒嘅質疑，當局就話嘞，規劃署、大埔地政處、環保署及漁護署尋日聯合到現場巡查，證實有關工程涉及嘅土地屬私人農地，不屬郊野公園範圍喎。其實，係咪屬郊野公園都好，當局都有責任保育濕地。
嗱，大浪西灣風波激起民憤之後，當局係就係承諾將全港五十四幅郊野公園毗鄰土地盡快納入法定圖則，以保育生態環境，點知港產官僚懶到出汁，事隔兩年幾嘞，處理咗嘅土地只係得嗰十九幅咁大把，其餘三十五幅土地至今無王管，白沙澳正正就係其中一塊，你話死唔死吖。
唉，好心港產官僚唔好懶得咁交關吖，一方面實牙實齒話要保育，一方面又唔嗲唔吊龜速處理，造成法律空窗期，咁咪即係鼓勵發展商加快收購入侵，反而令生態寶地仲死得快啲？環保人士講得就啱嘞，當局工作進度緩慢，先至係斷送高生態價值土地嘅元兇！
話時話，環保官僚又懵又懶，靠佢哋保護環境就真係緣木求魚o架咋，白沙澳因為未納入法定圖則而慘遭破壞，有啲土地就算納入保護範圍一樣難逃劫數。好似西貢白腊咁，夠納入咗發展審批地圖區啦，一樣被人又挖深坑，又建水壩，搞到面目全非，令人不忍卒睹。
到底港產官僚嘅懶散作風幾時至會改呀？到底生態環境幾時至會唔被破壞呀？如果官老爺真係戒唔甩條懶筋，不如自動摺埋，無謂靠害地球吖！