政情：高佬何俊賢打地鋪瞓覺
漁農界立法會議員何俊賢（Steven）身高有成六呎三吋，不過原來高人一等嘅佢都唔係咁歎o架咋，事關因為生得太高而買唔到床，搞到佢長年累月都係鋪張床褥打地鋪。Steven身為漁農界，佢對食嘢嘅要求都好高，鍾意食鹹水海鮮嘅佢就教路，話香港西面水域嘅九節蝦就最好味喎。
唔少人都想盡辦法增高，但身高六呎三吋嘅Steven就同我哋呻話生得高買床好麻煩，一係就買番嚟後拆咗塊床板，一係就要度身訂造，怕麻煩嘅佢惟有鋪張床褥喺地下就瞓，仲要凸咗成半隻腳出嚟，真係慘。
以前喺屯門魚市場從事物流工作嘅Steven對食海鮮都好有研究。Steven就話自己淨係會食鹹水魚，食蝦就只係食九節蝦，而且仲要係香港西面水域嘅九節蝦先最啱佢嘅口味。Steven咁嘴刁，唔怪得佢話擇偶條件係對方一定要識煮嘢食啦。