政情：建制派謀換走鼠王芬
香港經濟民生聯盟成員梁美芬（鼠王芬）喺建制派力谷下，當選立法會司法及法律事務委員會主席，不過一開波就畀泛民圍攻，日後睇怕都有排捱。見鼠王芬咁惹火，唔少建制派人士都話擔心以後鼠王芬主持會議時會下下被針對，到時建制派又要搵人開會幫拖，所以就有人提議，為免攞嚟煩，下年都係選過第二個做委員會主席，反正建制派都唔係冇其他人選咁話。
司法及法律事務委員會主席一職多年嚟落入公民黨（公文袋）手中，建制派都好不滿點解呢個委員會，咁耐以嚟要畀泛民玩晒。鼠王芬今屆就自動請纓做委員會主席，建制派為咗主席之位唔落入泛民之手，簡直係眾星拱照鼠王芬，支持佢做主席。點知鼠王芬一當選已經辣着火頭，主持首個會議仲因為未當選已私下同秘書處商議更改開會時間，而畀泛民圍攻，搞到要建制派開口幫拖。原本好簡單嘅開會時間問題都要搞成個星期，至尋日先決定到都係遷就番法律界人士，喺周二下午開會。
或撐謝偉俊廖長江入席
鼠王芬做主席，已經有激進派泛民揚言嚟緊會好好招呼佢。有建制派人士就話咁搞法即係次次開會都要搵夠人坐定定喺度，準備隨時撐鼠王芬，咁咪好唔得閒？所以有人就話下一年唔會再撐鼠王芬做主席。之不過，建制派咁難得踢走公文袋，又點會讓番個主席位出嚟吖？有建制派中人就話，其實佢哋都唔係冇法律界專才可以做主席o架，好似有「法律超人」之稱嘅謝偉俊（Paul），佢喺法律界都好多年，不過佢做嘅話可能分分鐘都一樣畀人玩，而且佢已經係政制事務委員會副主席，唔知係咪兼顧到。
建制派另一人選就係代表中華總商會嘅廖長江（Martin），Martin本身都係資深大律師，只不過Martin中總嘅形象太強，先冇人醒起原來佢都係大律師。相信Martin做嘅話應該會穩陣啲。
梁美芬話自己只做一年
我哋尋日都問過吓鼠王芬，點知佢就話自己不嬲都淨係話做一年，下一年嘅嘢一年後先算，又話自己都唔係咁霸道，咁就要睇佢未來一年嘅表現嘞。