中環出更：貪曾朝拜山 夜會「曾朋友」

貪曾兩夫婦尋日早上七點幾，搭政府車離開淺水灣道寓所，同平時一樣去到跑馬地聖瑪加利教堂，約四十分鐘後離開。佢哋離開時同班教友有講有笑，但對現場採訪嘅記者就不瞅不睬，甚無禮貌。離開教堂後，佢哋就直接搭車去到安葬自己雙親嘅柴灣天主教墳場，負責保護佢嘅G4保鏢仲要好無奈地幫手拎住一大樽清水。

自作主張幫別人花樽加水

貪曾去到父母墳前，佢就用水清潔雙親墳頭，同埋為插於墳前嘅鮮花加水，之後逕自下跪、合十禱告，佢老婆就靜靜企埋一邊，冇跟住一齊下跪。過咗半個鐘之後，貪曾兩夫婦終於離開呢片祥和之地，不過一身素服嘅貪曾，唔知係唔係見仲有水剩低唔好嘥，竟然自作主張幫附近六、七個墳頭嘅花樽加水，但又唔幫人清潔墳頭喎。

去到墳場，插花、淋水，好忙。（何偉鴻攝）	貪曾下跪、合十禱告，老婆就企埋一邊。	食飯食足三粒鐘，貪曾至同老婆坐車返屋企。（劉志城攝）

到夜晚貪曾竟同一大堆「曾朋友」喺香港會蒲頭，今次可能係佢於七一下台後最多人出席嘅一次聚會，可見關係仍然密切。七點半過後，先見貪曾兩公婆出現，之後就陸續見到東亞銀行主席李國寶夫婦、新鴻基地產聯席主席郭炳江，同埋自由黨榮譽主席田北俊夫婦前後腳嚟到，記者問佢哋係唔係同貪曾食飯，個個都不置可否。咁神秘，唔通貪曾又打梁振英政府壞主意，諗住夾埋商界又玩鋪勁？呢餐飯食足三粒鐘，各人才陸續離開。

郭炳江	李國寶	田北俊

尋晚喺香港會門外現身嘅，仲有前政務司司長陳方安生，佢話佢只係同家人嚟食飯，無參加貪曾個聚會喎。又會咁啱嘅。

卓妮